Additional Reading Unit 24

Vergiliana

Scan lines where a word (particularly those ending in a) is grammatically ambiguous (e.g. divina in l. 15 of the first passage). The metre is the hexameter.



1. At a banquet held in his honour Aeneas agrees to tell Dido his story
   
   
   Conticuere omnes intentique ora tenebant.
   inde toro pater Aeneas sic orsus ab alto:
   infandum, regina, iubes renovare dolorem,
   Troianas ut opes et lamentabile regnum
   eruerint Danai, quaeque ipse miserrima vidi
   et quorum pars magna fui. quis talia fando
   Myrmidonum Dolopumve aut duri miles Ulixi
   temperet a lacrimis? et iam nox umida caelo
   praecipitat suadentque cadentia sidera somnos.
   sed si tantus amor casus cognoscere nostros
   et breviter Troiae supremum audire laborem,
   quamquam animus meminisse horret luctuque refugit,
   incipiam. fracti bello fatisque repulsi
   ductores Danaum tot iam labentibus annis
   instar montis equum divina Palladis arte
   aedificant, sectaque intexunt abiete costas:
   votum pro reditu simulant: ea fama vagatur.
   huc delecta virum sortiti corpora furtim
   includunt caeco lateri penitusque cavernas
   ingentis uterumque armato milite complent.
   
   
2. After relating the story of the fall of Troy Aeneas tells Dido how he left his native land
   
   Postquam res Asiae Priamique evertere gentem
   immeritam visum superis, ceciditque superbum
   Ilium et omnis humo fumat Neptunia Troia,
   diversa exilia et desertas quaerere terras
   auguriis agimur divum classemque sub ipsa
   Antandro et Phrygiae molimur montibus Idae,
   incerti quo fata ferant, ubi sistere detur,
   contrahimusque viros. vix prima inceperat aestas
   et pater Anchises dare fatis vela iubebat,
   litora cum patriae lacrimans portusque relinquo
   et campos ubi Troia fuit. feror exsul in altum
   cum sociis natoque penatibus et magnis dis.
   
   
3. At a divine council Jupiter complains of the conduct of the gods
   
   Panditur interea domus omnipotentis Olympi
   conciliumque vocat divum pater atque hominum rex
   sideream in sedem, terras unde arduus omnis
   castraque Dardanidum aspectat populosque Latinos.
   considunt tectis bipatentibus, incipit ipse
   'caelicolae magni, quianam sententia vobis
   versa retro tantumque animis certatis iniquis?
   abnueram bello Italiam concurrere Teucris.
   quae contra vetitum discordia? quis metus aut hos
   aut hos arma sequi ferrumque lacessere suasit?
   adveniet iustum pugnae (ne arcessite) tempus,
   cum fera Karthago Romanis arcibus olim
   exitium magnum atque Alpis immittet apertas:
   tum certare odiis, tum res rapuisse licebit.
   nunc sinite et placitum laeti componite foedus.'
   
   
4. The praises of Italy
   
   Sed neque Medorum silvae, ditissima terra,
   nec pulcher Ganges atque auro turbidus Hermus
   laudibus Italiae certent, non Bactra neque Indi
   totaque turiferis Panchaia pinguis harenis.
   haec loca non tauri spirantes naribus ignem
   invertere satis immanis dentibus hydri,
   nec galeis densisque virum seges horruit hastis:
   sed gravidae fruges et Bacchi Massicus umor
   implevere: tenent oleae armentaque laeta.
   hinc bellator equus campo sese arduus infert,
   hinc albi, Clitumne, greges et maxima taurus
   victima, saepe tuo perfusi flumine sacro
   Romanos ad templa deum duxere triumphos.
   
   (In line 6 satīs is the m. abl. pl. of the past participle of sero, not the adverb satis)
   

(c) Gavin Betts 2000